Chanson de Léopold Pingré, composée en 1872 sur l'air des "Pompiers de Nanterre". Cette chanson évoque la voiture-fourrière des sergents de ville chargés de capturer les chiens errants. Cette cage montée sur deux roues était traînée par un âne.
I.
France, approche, et sois tout éreilles, Car ej viens t' canter chés merveilles D' einne carette rare qu' on n' voit qu' l' été Mais dont chatchien est épeuté. Trois hertchules, ein beudet, Einne etnaille, einne grande nasse, Quaind tout cho d' vant vous passe, Oz est forché d' tranner :
Refrain
El voiture à tchiens, ch' est ein équipage, Qui foit bien du bruit da tou l' ville d'Amiens, Quand i passe quéque part, ch'est pis qu'ein orage, I met su les deints Et tous chés betes et tous chés geins Barbets, loulous, rotchets, carlins reintrez da vos niches, Filez tertous, muchez-vous bien, Vlo l' voiture à tchiens !
II.
Tout l' monde sait avu quelle adrèche I vous gobent ein tchien ein détrèche. Portaint quéqu' fois, quoiqu' bien malins, Chés bêtes i sont plus fins qu'chés geins. Halté-lo, dit ch' nassier, Vite, ouvre l' tabatière ! Crac, i tape par derrière D' Azor qui vient d' filer.
III.
Ch'est ein coeup d' scène d' ein fin comique Qui d' rire fait braire el pauv' bourrique, Quand on voit ch' malheureux péqueux L' ver sein filet d'ein air moneux. Chés moutards rigolant, D' vir qu' il o manqué s' proie S' ein vont l' tchoeur reimpli d' joie Sur tous les tons criant :
IV.
Jeudi dernier, einne aventure Ez arrivée rue dé l' pâture : Ej vois assis su sein séant Comme ein homme, ein berger tout blanc. Ein deux teimps eimballé, I plonge au fond dé l' nasse, Mais ch' n' étoit ô disgrâche, Qu'ein caniche eimpaillé.
V.
J' o einn tchotte femme belle comme ein ange, Mais d'einne humeur bizarre, étrange. A m' dit quéqu' fois : j' voudrois bien Qu' el carette a t' ramasse, veurien ! Qué bonheur, si m'n espoir Ein jour es réalise ! J' te promets, foi d'Elise, D' canter à ch' l' abattoir :
VI.
Einfan pour terminer l' histoire Il est einne cose assez notoire, Ch'est qu' i s' roit boin d' conseiller A bien des geins dé ' s' foire mus' ler. Car, vraimeint, einter nous, Quand ch' fiacre lo vient, sans rire A grameint o peut dire Emz amis garde à vous !
EN R' V' NANT D' CHEZ BARNUM
Chanson de Louis Seurvat composée en 1902. Cette chanson évoque la venue à Amiens du cirque "Barnum". Il avait planté son chapiteau sur l'esplanade de la Hotoie.
I.
A forche ed lire dains chell' gazette Equ' Barnum alloit v' nir à Miens, Em fème a s' étoit joutché da s' tête (Quand all' vut quèqu' cose, a l' vut bien) Qu' oz iroèmes vir el grande affoire, Ches acrobates, chés singes, chés qu'vaux, Chés girafes pis chés gromadaires, Chés nénéphants pis chés chameaux, J'li dis ? Voyons, Laïde, Ed quoi qu' ch' est qu' tu t' lapides ? Né zzé vois-tu point d' ou moison Photographiés d' sur èch pignon ? Tout cho, ch' est del réclame Pour amorcer chés femmes Et pis pour foire meudimeint A chés hommes dépeinser d' l' argeint. Non, qu'al dit, m' n' homme, J' vux aller vir Barnum Peindant qu' il est dains l' Somme, Ch' est plus pratique. Pour sûr, Mimir, N' i éro pus d' train d' plaisir Quand on n' pourro pus l' vir Qu'ein Amérique.
II.
Dimainche, a s' déjouque vite et vite, Laïde einfique sein bieu cotron, Mi m' rouillère neuve, nou tchout Polyte Ses effets d' première communion. O courons comme des fous à l' gare, Comme einn' locomotive j' hainsois, Ein coeup d' sifflet pis ch' train démarre, Quel monde da chés troisièmes, jamois ! Ein face y avoit l' grosse panche Ed Tutur ed Gratt' panche A droite Titisse èch' matchignon Qui m' barbotoit toudis m' n ognon: Il o fallu qu' jé m' fache Pour èm' foire einn' tchotte plache, Pour caser m' fème pis m' éfaint Da ein coin d' èch' compartimeint. O sommes tartous Dains l' rue des Trois Cailloux, Mais vlo Polyte nou tchout Qui s' met à braire. J' brûle ed caleur, J'ai du mo à min tchoeur, Ch'est ein coeup d' maisaveur Dé l' faute dé t' mère.
III.
Oz arrivons à la hotoie, Vraiment, ch' étoit pire qu' à l' Saint-Jean ! Vlo Laïde qu' ai crie comme einne oie A foire ertourner tous chés geins : Diu, n' ein vlo-t-i des mètes ed toile ! Gno pus d' chonq cheint mille poires ed drop, Qu' ai dit ein r' béyant azz étoiles, Ein j' tant ein l'air ses deux grands bros. Mais, tu t' taitos, pétète Que J' li dis, hé, grande bête, En' vois-tu point equ' ch' est l' momeint D' preinde sein billet pour reintrer d' dains L' moison d' chés phénomènes ? Mais, a n' s'ra point sans peine Car pour avoir sein tour, I feut passer ein quart ed jour. Polyte brayoit, M' fème a s'impatientoit, Et pis mi j' étouffois A foire el quaine. Quand qu' ch' est à nous, J' saque mes quat' lives dix sous, Pis o reintrons tertous Sans r' preindre haleine.
IV.
Mais vlo Polyte qui r' c' meinche à braire, Il o peur ed chés nénéphants. Qu' ch'est-t-i eimbétant qu' al dit l' mère Ed voyager avu dz éfants ! I d'mand e pourquoi qu' à chés girafes El boin Diu leuz y o monté l' cou. Si tu d'vises coire, j' té fous, einne baffe, Mouque tein nez, tais-tté, leuwerou ! Mais vlo chés phunomènes, Chés géants, chés tchottes naines, Ch' lhomme esquelette, ch' cartchulateur, El fème à barbe et pis ch' farceur Qui o einne lampe à pétrole Da s' gargate, cho ch' est drole, Et ch' qu'i o coire ed pus bieu, Ch' est chti qu' o peinturluré s'pieu. Tout cho n'est rien, Ah, gno coire ech' l' homme-tchien, Ch' est triste pour ein chrétien, Ch' n' est mie croyabe ! Ch' qui foit gémir, Ch' est d' vir fème es norrir Afin de n' point moirir, Avuc ein sabe
V.
Tout cho n' étoit que ch' triambule, Comme qui diroit l' apéritif, Dains ch' grand Barnum o s'y boustchule, Et pis vlo ch' momeint décisif. Pour lors, peindant einne heure eintière, O nn' avons vu d' tous les façons, Az yux freumés, d' peur ed vir tcherre Chés acrobates ed leu plafond. A droite, à goeuche, dains ch' bout Dains ch' mitan, tout partout, Sains s' erposer einne seule minute, Chés clouss' i foisoitt, del tchulbute. Des hommes, des fèmes, dz éfants, Des nègues noirs, des nègues blancs, Et pis toutes sortes ed bêtes Qu' i manoeuvroitt' à coeups d' sonettes. Ein mitan d' fou, Monté sur sein vélou Descheind tout d' miteinbout D' einne grande étchelle. Jésus, Sangneur, Ch' est-i point ein malheur ! Peut-on r' béyer d' boin tchoeur Einne cose pareille !
VI.
Vlo qu' ch' est toute, ch' est l' fin dé l' parade. Oz est r' crands à forche d' ête assis. Oz o sein tchul ein marmelade Laïde, Polyte, pis mi aussi, Quand tout d'ein coeup no maudit jonne Qu'il étoit coire tout écrampi S' laisse tcherre par el pan dé m' bastchenne A travers chés planches dé ch' plantchi. Jé l' rattrappe comme ej pus, I brait à qui miux miux Os suivons ol fil dé l' filière. Po r nous déflitcher dé l' galère Laïde accroche min bros, Polyte suit pos à pos, Et pis mi j' erseins einne escousse : O v' noit dé m' pikpotchéter m' bourse L' soir ein reintrant, Tout ein ekmin foisant, J' disois ein mamonnant, La mort dans l'âme, Péneud, moneux : Ch' est des attrape-nigoeuds, Ch' n' est point d'main, nom des eus, Qu' j' acout'rai m' femme !
L'CANCHON D'EL' VALLÉE ou Saleux-Salouël
Chanson d'Emmanuël Bourgeois
I.
Ami barbu ou imberbe In buvant in coeup d'piction, Répétons in viux proverbe Bien connu da nou canton.
Refrain
Saleux Salouël Vers et pis Bacouël Plachy ou Byon Y o d'fameux lurons, Saleux Salouël Vers et pis Bacouël Plachy ou Byon Y o d'fameux bib'rons.
II.
A Salouê, six jours pa s'minne O les trouve au cabaretl, El'septième i vont dins l'plinne Dormir avu ches beudets.
III.
A Saleux, poéys d'fabrique o n'craint ni l'diable ni l'Bon Diu, O boét du ch'nik à l'abrrique Ch'est à chti qui pompro l'miux.
IV.
A Vers, o sait rire et boére Danser canter foére l'amour, Peut-on avoér l'humeur noére In s'amusant nuit et jour.
V.
A Bacoui, o n'est point riche On aime aussi boére in coeup, D'ech'pu pauv jusquà ch'pu riche Pour boére in'feut point d'coutieu.
VI.
In Normandie in Bourgongne O n'boét point conme par ichi, In France i n'y o point d'ivrongnes Comparables à cheux d'Plachy.
VII.
A Oubyon poéys sans r'sources On adore aussi ch'brin d'vin, Chatchin i boét à la ourse Sans rien dire à sin voésin.
VIII.
Rappelons inne tournée nouvelle Pis cantons fiers et joyeux, Honneur à tout l'vallée d'Selle Qu'o fourni d'pareils buveux.